માત્ર 2 વર્ષ 2 મહિનાની ઉંમરે 8 ગ્રહોના નામ સચોટ ક્રમમાં વીજળીક ઝડપે બોલ્યા; “IBR Achiever”નું ગૌરવ પ્રાપ્ત, વલસાડ અને ગુજરાતનું નામ રોશન કર્યું.
માત્ર બે વર્ષની ઉંમરે પણ અસાધારણ પ્રતિભાથી દેશભરમાં ઓળખ ઉભી કરી શકાય છે, તેનું જીવંત ઉદાહરણ વલસાડની નાનકડી ખ્યાના સોહમ પટેલ છે. તિથલ રોડ સ્થિત પાલિહીલ વિસ્તારમાં રહેતી ખ્યાનાએ પોતાની અદ્ભુત યાદશક્તિના આધારે પ્રતિષ્ઠિત India Book of Records 2026માં સ્થાન મેળવી સમગ્ર વલસાડ અને ગુજરાતનું ગૌરવ વધાર્યું છે.
તા. 9 ફેબ્રુઆરી, 2024ના રોજ જન્મેલી ખ્યાના માત્ર 2 વર્ષ અને 2 મહિનાની ઉંમરે સમગ્ર સૌરમંડળના 8 ગ્રહોના નામ માત્ર 5 સેકન્ડથી પણ ઓછા સમયમાં યોગ્ય ક્રમમાં બોલી બતાવવાનો અનોખો રેકોર્ડ નોંધાવવામાં સફળ રહી છે. આ અસાધારણ સિદ્ધિને ધ્યાનમાં રાખી India Book of Records દ્વારા તેને સત્તાવાર રીતે “IBR Achiever” તરીકે સન્માનિત કરવામાં આવી છે.
આટલી નાની ઉંમરે આ પ્રકારની ઝડપ અને ચોકસાઈ સાથે સૌરમંડળના તમામ ગ્રહોના નામ બોલી બતાવવાનો આ રેકોર્ડ અત્યંત દુર્લભ માનવામાં આવે છે. ખ્યાનાની તેજસ્વી સ્મરણશક્તિ અને શીખવાની ક્ષમતાની દેશભરમાં પ્રશંસા થઈ રહી છે.
ખ્યાનાના પિતા ડૉ. સોહમ કલ્પેશ પટેલ વલસાડ અને વાપીમાં જાણીતા ન્યૂરો સર્જન છે, જ્યારે માતા ડૉ. રુચિ સોહમ પટેલ (શાહ) વલસાડની કસ્તુરબા હોસ્પિટલમાં ગાયનેકોલોજિસ્ટ તરીકે સેવારત છે. વ્યસ્ત વ્યવસાયિક જીવન વચ્ચે પણ બંનેએ પુત્રીની પ્રતિભાને ઓળખી યોગ્ય માર્ગદર્શન આપ્યું, જેના પરિણામે આજે ખ્યાનાએ રાષ્ટ્રીય સ્તરે આ ગૌરવપૂર્ણ સિદ્ધિ હાંસલ કરી છે.
પાલિહીલ વિસ્તારમાં આવેલા તેમના નિવાસસ્થાને હાલ ખુશીનો માહોલ છે અને સમગ્ર શહેરમાંથી અભિનંદનની વર્ષા થઈ રહી છે.
નાનકડી ખ્યાના માટે આકાશ હવે મર્યાદા નથી, પરંતુ નવી ઊંચાઈઓ તરફની માત્ર શરૂઆત છે.
