નેશનલ ઇન્સ્ટિટ્યૂટ ઑફ સોશિયલ ડિફેન્સ અને દીવ જિલ્લા પ્રશાસનનો સંયુક્ત ઉપક્રમ; આંગણવાડી કાર્યકરો, ફ્રન્ટલાઇન કર્મચારીઓ અને પરિવારના સભ્યોને વૃદ્ધોની સંભાળ અંગે તાલીમ અપાશે.
દીવ | 9 ઑક્ટોબર, 2026
કેન્દ્ર સરકારના સામાજિક ન્યાય અને અધિકારીતા મંત્રાલય હેઠળ કાર્યરત નેશનલ ઇન્સ્ટિટ્યૂટ ઑફ સોશિયલ ડિફેન્સ (NISD) તથા કેન્દ્રશાસિત પ્રદેશ દાદરા અને નગર હવેલી તથા દમણ અને દીવના વહીવટીતંત્ર દ્વારા દીવમાં પાંચ દિવસીય ‘જેરિયાટ્રિક કેરગિવર્સ ટ્રેનિંગ પ્રોગ્રામ’નું આયોજન કરવામાં આવ્યું છે. 9થી 13 ઑક્ટોબર, 2026 દરમિયાન યોજાનારા આ કાર્યક્રમનું ઉદ્ઘાટન ભારત સરકારના સામાજિક ન્યાય અને અધિકારીતા મંત્રાલયના સચિવ સુધાંશ પંતે કર્યું હતું.
દીવના કેવડી સ્થિત એજ્યુકેશન હબ ખાતે યોજાયેલા કાર્યક્રમમાં દીવના કલેક્ટર રાહુલ દેવ બૂરા સહિત મંત્રાલયના વરિષ્ઠ અધિકારીઓ ઉપસ્થિત રહ્યા હતા.
કાર્યક્રમમાં મંત્રાલયના સંયુક્ત સચિવ ડૉ. સંદીપ આર. રાઠોડ, સજીશ કુમાર એન. અને નેશનલ ઇન્સ્ટિટ્યૂટ ઑફ સોશિયલ ડિફેન્સના ડિરેક્ટર ગૌરવ સિંહ રાજાવત સહિતના અધિકારીઓ હાજર રહ્યા હતા. આ ઉપરાંત કેન્દ્રશાસિત પ્રદેશના વહીવટીતંત્રના અન્ય અધિકારીઓ પણ ઉપસ્થિત રહ્યા હતા.
વૃદ્ધોની સંભાળ માટે તાલીમ પર ભાર
આ તાલીમ કાર્યક્રમનો મુખ્ય હેતુ વૃદ્ધોની સંભાળ સાથે સંકળાયેલા લોકોની ક્ષમતામાં વધારો કરવાનો છે. કાર્યક્રમની સત્તાવાર માહિતી મુજબ, તેમાં આંગણવાડી કાર્યકરો, ફ્રન્ટલાઇન કર્મચારીઓ, પ્રાથમિક સંભાળ રાખનારાઓ અને પરિવારના સભ્યોને ધ્યાનમાં રાખવામાં આવ્યા છે.
તાલીમમાં વૃદ્ધોની દૈનિક સંભાળ, આરોગ્ય અને સુખાકારી, સલામતી, માનસિક અને ભાવનાત્મક સહાય તેમજ વૃદ્ધો માટે સહાયક વાતાવરણ ઊભું કરવા જેવા પાસાઓ પર ધ્યાન કેન્દ્રિત કરવામાં આવ્યું છે.
