વાપીમાં ગુંજન સ્થિત અંબા માતા મંદિરમાં ભક્તિ, શક્તિ અને શિસ્તનો અનોખો સંગમ; ખેલૈયાઓ માટે વિશેષ વ્યવસ્થા, મહાઆરતી, યજ્ઞ અને હવન સહિતના ધાર્મિક કાર્યક્રમોનું આયોજન.
વાપી: નવરાત્રી એટલે શક્તિની આરાધના, ભક્તિનો ઉત્સવ અને ગરબાની રમઝટ. ત્યારે વાપીના ગુંજન વિસ્તારમાં આવેલા ઇન્ડસ્ટ્રીયલ એસ્ટેટ ચેરિટેબલ ટ્રસ્ટ સંચાલિત અંબા માતા મંદિરમાં છેલ્લા 40 વર્ષથી સાર્વજનિક નવરાત્રી મહોત્સવની ભવ્ય ઉજવણી કરવામાં આવે છે. આ વર્ષે પણ અહીં માતાજીના દર્શન કરવા અને ગરબે રમવા માટે મોટી સંખ્યામાં ભક્તો ઉમટી રહ્યા છે. આયોજકોના જણાવ્યા અનુસાર, અહીં દરરોજ અંદાજે 15,000 જેટલા ભાવિકો માતાજીનાં દર્શન અને ગરબાનો લાભ લઈ રહ્યા છે.
🔱 પાર્ટી પ્લોટને ટક્કર આપે એવું આયોજન! 15 હજાર જેટલા શ્રદ્ધાળુઓ માતાજીના દર્શન કરી ગરબે રમે છે.
ભક્તિ સાથે ભવ્ય આયોજન
અંબા માતા મંદિર ખાતે નવરાત્રી દરમિયાન ધાર્મિક કાર્યક્રમોની સાથે ખેલૈયાઓ માટે પણ સુંદર વ્યવસ્થા કરવામાં આવી છે. આધુનિક સાઉન્ડ સિસ્ટમ સાથે ગ્રાઉન્ડમાં બે અલગ-અલગ સ્થળોએ ગરબાનું આયોજન કરવામાં આવ્યું છે. ભાઈઓ અને બહેનો માટે અલગ વ્યવસ્થા ઊભી કરવામાં આવી છે, જેથી સૌ કોઈ સુવિધાપૂર્વક ગરબે રમી શકે.
દર્શનાર્થીઓ માટે સુવ્યવસ્થિત વ્યવસ્થા
મંદિરમાં ભક્તોની અવરજવર સરળ રહે તે માટે પ્રવેશ અને બહાર નીકળવાના રસ્તા અલગ રાખવામાં આવ્યા છે. દર્શન કર્યા બાદ ભક્તોને પ્રસાદ મળી રહે તેની પણ વ્યવસ્થા કરવામાં આવી છે. વરિષ્ઠ નાગરિકો માટે વિશેષ સુવિધાઓ ઊભી કરવામાં આવી છે, જેથી તેઓ કોઈ અગવડ વિના માતાજીનાં દર્શન કરી શકે.
મહાઆરતીથી યજ્ઞ-હવન સુધી ધાર્મિક માહોલ
નવરાત્રી દરમિયાન દરરોજ મહાઆરતીનું આયોજન કરવામાં આવે છે. આઠમના પવિત્ર દિવસે હોમ-હવન અને યજ્ઞનું આયોજન પણ કરવામાં આવે છે, જેમાં દર વર્ષની જેમ મોટી સંખ્યામાં શ્રદ્ધાળુઓ ભાગ લેતા હોય છે.
ટ્રસ્ટીઓ, સ્વયંસેવકો અને પોલીસનો સહયોગ
ટ્રસ્ટી કમલેશ પટેલના જણાવ્યા અનુસાર, આ ભવ્ય આયોજનને સફળ બનાવવા માટે પ્રશાસન, પોલીસ વિભાગ અને મંદિરના સ્વયંસેવકોનો સહયોગ મળી રહ્યો છે. સ્વયંસેવકો અને સુરક્ષાકર્મીઓ ભક્તોની સુવિધા અને સુરક્ષા માટે સતત કાર્યરત રહે છે.
વાપીમાં પાર્ટી પ્લોટમાં યોજાતા ભવ્ય ગરબા મહોત્સવોની વચ્ચે આંબા માતા મંદિરનો સાર્વજનિક નવરાત્રી મહોત્સવ ધાર્મિક આસ્થા, પરંપરા અને વ્યવસ્થિત આયોજનના કારણે વિશેષ ઓળખ ધરાવે છે.
આસ્થા, ભક્તિ અને ગરબાની રમઝટથી ગુંજી ઊઠતું અંબા માતા મંદિર નવરાત્રી દરમિયાન વાપીના ભક્તો માટે આકર્ષણનું કેન્દ્ર બન્યું છે.
જય માતાજી!
