મહાનુભાવોએ વૃક્ષો વાવી પર્યાવરણ જતનનો સંદેશ આપ્યો, વૃક્ષ રથને લીલી ઝંડી અપાઈ; મોટી સંખ્યામાં વિદ્યાર્થીઓ જોડાયા
વાપીમાં 77મા વન મહોત્સવની ઉજવણી કરવામાં આવી હતી. નામધા ખાતે આવેલા આર્ટ્સ એન્ડ કોમર્સ કોલેજના કેમ્પસમાં યોજાયેલા કાર્યક્રમમાં ‘એક પેડ માં કે નામ 3.0’ અંતર્ગત વૃક્ષારોપણ કરવામાં આવ્યું હતું.
કાર્યક્રમમાં વાપી મહાનગરપાલિકાના મેયર દક્ષાબેન પટેલ, ડેપ્યુટી મેયર મિતેષભાઈ દેસાઈ, વન વિભાગ અને સામાજિક વનીકરણ વિભાગના અધિકારીઓ સહિત મોટી સંખ્યામાં વિદ્યાર્થીઓ અને લોકો ઉપસ્થિત રહ્યા હતા.
દીપ પ્રાગટ્ય સાથે કાર્યક્રમનો પ્રારંભ થયો હતો. ત્યારબાદ સ્વાગત ગીત, મહાનુભાવોનું સ્વાગત અને બાળ પ્રસ્તુતિ યોજાઈ હતી. કાર્યક્રમ દરમિયાન ચંદનના રોપાઓ આપી વિશેષ વ્યક્તિઓનું સન્માન પણ કરવામાં આવ્યું હતું.
કાર્યક્રમમાં વલસાડ દક્ષિણ વન વિભાગના નાયબ વન સંરક્ષક ડી. એન. રબારી, સામાજિક વનીકરણ વિભાગના આર. આર. ચૌધરી (GFS), વાપી મહાનગરપાલિકાના કમિશનર એન. એફ. ચૌધરી સહિતના અધિકારીઓ ઉપસ્થિત રહ્યા હતા.
પારડી ફોરેસ્ટ રેન્જના RFO અંકિત પટેલ સહિત વન વિભાગના અધિકારીઓ અને કર્મચારીઓએ કાર્યક્રમના આયોજન અને સંચાલનમાં મહત્વની ભૂમિકા ભજવી હતી.
વાપી મહાનગરપાલિકા દ્વારા પર્યાવરણ સંરક્ષણ અને વૃક્ષારોપણની પ્રવૃત્તિઓને આગળ વધારવા માટે આવી ઝુંબેશો યોજવામાં આવી રહી છે. ડેપ્યુટી મેયર મિતેષ દેસાઈએ પણ વૃક્ષારોપણ અને પર્યાવરણ જતનની પહેલને મહત્વ આપતા લોકોને તેમાં જોડાવા અંગે સંદેશ આપ્યો હતો.
કાર્યક્રમના મુખ્ય આકર્ષણ સમા વૃક્ષારોપણ કાર્યક્રમ યોજાયો હતો. મેયર દક્ષાબેન પટેલ સહિત ઉપસ્થિત મહાનુભાવોએ કોલેજ કેમ્પસમાં વૃક્ષો વાવ્યા હતા. વૃક્ષારોપણ સાથે માત્ર છોડ વાવવાનો જ નહીં, પરંતુ તેના જતન અને સંવર્ધનનો સંદેશ પણ આપવામાં આવ્યો હતો.
સામાજિક વનીકરણ વિભાગ તરફથી પણ પર્યાવરણ જાળવણીમાં વૃક્ષારોપણની ભૂમિકા અંગે લોકોને જાગૃત કરવામાં આવ્યા હતા.
આર. આર. ચૌધરીએ પર્યાવરણ જતન માટે સતત આગળ વધવાની જરૂરિયાત પર ભાર મૂક્યો હતો અને વિભાગ દ્વારા કરવામાં આવતી વિવિધ પર્યાવરણલક્ષી કામગીરી અંગે માહિતી આપી હતી.
કાર્યક્રમ દરમિયાન વૃક્ષ રથને પણ લીલી ઝંડી આપી પ્રસ્થાન કરાવવામાં આવ્યો હતો. ‘એક પેડ માં કે નામ 3.0’ના સંદેશ સાથે વૃક્ષારોપણની પ્રવૃત્તિને વધુ વ્યાપક બનાવવા પ્રયાસ કરવામાં આવ્યો છે.
કાર્યક્રમમાં મોટી સંખ્યામાં વિદ્યાર્થીઓ જોડાયા હતા. વિદ્યાર્થીઓ સહિત ઉપસ્થિત લોકોએ વૃક્ષારોપણ અને પર્યાવરણ સંરક્ષણનો સંદેશ આપ્યો હતો.
વન મહોત્સવનો સાચો હેતુ માત્ર એક દિવસ વૃક્ષ વાવવામાં નહીં, પરંતુ વાવેલા વૃક્ષોનું સતત જતન અને સંવર્ધન કરવામાં છે. અને આ જ સંદેશ સાથે કાર્યક્રમમાં એક અપીલ પણ કરવામાં આવી— “પ્લાસ્ટિક પ્રદૂષણ અટકાવીએ, પર્યાવરણ બચાવીએ.”
