બિલખાડી, કોલક અને દમણગંગાના પૂરે શહેરમાં કચરાના ઢગલા છોડી દીધા; હવે મહાનગરપાલિકા અને આરોગ્ય વિભાગ માટે અગ્નિપરીક્ષા
વાપી: વલસાડ જિલ્લામાં ગઈકાલે પડેલા ધોધમાર વરસાદે જનજીવનને ભારે અસર પહોંચાડી હતી. વાપી GIDC, વાપી મહાનગરપાલિકા વિસ્તાર તેમજ અનેક નીચાણવાળા વિસ્તારોમાં પાણી ભરાઈ જતાં લોકોને ભારે હાલાકીનો સામનો કરવો પડ્યો હતો.
બિલખાડી, કોલક નદી અને દમણગંગા નદીમાં આવેલા પૂરના પાણી આજે ઓસરી ગયા છે, પરંતુ પાણી સાથે આવેલી ગંદકી હવે સમગ્ર શહેર માટે નવા સંકટનું કારણ બની રહી છે.
આજે સવારે વરસાદે વિરામ લેતાં જ શહેરનું એક અલગ જ ચિત્ર સામે આવ્યું. જ્યાં નજર કરો ત્યાં કચરો, પ્લાસ્ટિક, ઝાડ-ઝાંખર, સડી ગયેલો કચરો અને ગંદકીના ઢગલા જોવા મળી રહ્યા છે. અનેક સ્થળોએ પુલ નીચે કચરો જામી ગયો છે, જ્યારે નદીના કિનારા અને રસ્તાઓ પર ગંદકીનું સામ્રાજ્ય છવાઈ ગયો છે.
આ દૃશ્યો માત્ર ગંદકી દર્શાવતા નથી, પરંતુ આવનારા દિવસોમાં મચ્છરજન્ય અને પાણીજન્ય રોગચાળાની ગંભીર ચેતવણી પણ આપી રહ્યા છે. વરસાદી પાણી ઊતરી ગયા બાદ અનેક સ્થળોએ પાણી ભરાયેલું છે, જે મચ્છરોના પ્રજનન માટે અનુકૂળ બની શકે છે.
હાલ મહાનગરપાલિકા, GIDC અને અન્ય સરકારી વિભાગો સફાઈની કામગીરીમાં લાગી ગયા છે, પરંતુ માત્ર દેખાવ પૂરતી સફાઈથી કામ ચાલવાનું નથી. જ્યાં સુધી કચરાનો સંપૂર્ણ નિકાલ નહીં થાય, ગટર અને ડ્રેનેજ વ્યવસ્થાની સફાઈ નહીં થાય અને આરોગ્ય વિભાગ દ્વારા ફોગિંગ, દવા છંટકાવ તેમજ રોગ નિયંત્રણની અસરકારક કામગીરી હાથ ધરવામાં નહીં આવે, ત્યાં સુધી લોકો માટે ચિંતા યથાવત રહેશે.
પૂરનું પાણી ઉતરી જાય એટલે સંકટ સમાપ્ત થઈ ગયું એવું માનવું સૌથી મોટી ભૂલ સાબિત થઈ શકે છે. હકીકતમાં હવે શરૂ થાય છે બીજી લડાઈ—રોગચાળા સામેની લડાઈ.
નાગરિકોએ પણ સાવચેતી રાખવી જરૂરી છે. ઘરની આસપાસ પાણી ભરાવા ન દેવું, પીવાનું પાણી ઉકાળીને પીવું, ગંદકીથી દૂર રહેવું અને તાવ, ઝાડા, ઊલટી અથવા અન્ય લક્ષણો જણાય તો તરત તબીબી સારવાર લેવી જોઈએ.
આપત્તિ પછીની સફાઈ અને આરોગ્ય સુરક્ષા એ જ આગામી દિવસોમાં વાપી માટે સૌથી મોટો પડકાર બનશે. જો તંત્ર અને નાગરિકો બંને સમયસર જવાબદારી નિભાવશે તો સંભવિત રોગચાળાને અટકાવી શકાશે.
