1980માં શરૂ થયેલો વિવાદ 46 વર્ષ પછી પણ ચર્ચામાં; સુપ્રીમ કોર્ટના ચુકાદા બાદ ફરી ગરમાયું સમગ્ર પ્રકરણ
વાપી/ઉમરગામ: વલસાડ જિલ્લાના ઉમરગામ તાલુકાના સરીગામ GIDCના 20 ઔદ્યોગિક પ્લોટનો વિવાદ માત્ર જમીનનો કેસ નથી. આ કેસમાં જમીન સંપાદન, વળતર, ઔદ્યોગિક પ્લોટની ફાળવણી, હાઈકોર્ટનો ચુકાદો, સુપ્રીમ કોર્ટનો અંતિમ નિર્ણય અને હવે રાજકીય આક્ષેપો—આ બધું એકસાથે જોડાયેલું છે. તાજેતરમાં સુપ્રીમ કોર્ટે આપેલા ચુકાદા અને ત્યારબાદ કોંગ્રેસની પ્રેસનોટને કારણે આ કેસ ફરી ચર્ચાના કેન્દ્રમાં આવ્યો છે.
1980માં GIDCએ સરીગામ ઇન્ડસ્ટ્રીયલ એસ્ટેટ વિકસાવવા માટે અનેક જમીનોનો કબજો લીધો. તે સમયે સંબંધિત જમીન સરકારના નામે હોવાનું માનવામાં આવતું હોવાથી તેના પર ઔદ્યોગિક વિકાસ કરવામાં આવ્યો. બાદમાં જમીનની માલિકી અંગેનો વિવાદ કાનૂની લડાઈમાં ફેરવાયો.
વર્ષ 2014માં જમીન સીલિંગ સંબંધિત કાર્યવાહી અંતે મૂળ માલિકના પક્ષમાં ગઈ. ત્યારબાદ વર્ષ 2016માં સંબંધિત જમીન અંદાજે ₹30 લાખમાં ખરીદવામાં આવી અને ત્યારથી વળતરનો દાવો શરૂ થયો.
2022: રોકડ નહીં, 20 ઔદ્યોગિક પ્લોટ
વિવાદ દરમિયાન GIDC દ્વારા રોકડ વળતરના બદલે 20 વિકસિત ઔદ્યોગિક પ્લોટ ફાળવવાનો નિર્ણય લેવામાં આવ્યો. આ જ નિર્ણય બાદ સમગ્ર મામલો વધુ વિવાદાસ્પદ બન્યો.
ગુજરાત હાઈકોર્ટે 20 પ્લોટની ફાળવણીને ગેરકાયદેસર ગણાવી રદ કરી હતી. સાથે જ અરજદારના વળતર અંગે કાયદા મુજબ કાર્યવાહી કરવાની વાત કહી હતી. આ કેસમાં હાઈકોર્ટની નોંધો બાદ સમગ્ર મામલો વધુ ચર્ચામાં આવ્યો.
24 જુલાઈ 2026ના રોજ સુપ્રીમ કોર્ટે હાઈકોર્ટના મુખ્ય તારણોને યથાવત રાખ્યા. કોર્ટે 20 પ્લોટની ફાળવણી રદ જ રાખી અને અરજદારને વિકસિત ઔદ્યોગિક પ્લોટના આધારે નહીં પરંતુ કૃષિ જમીનના મૂલ્યાંકન પ્રમાણે આશરે ₹1.17 કરોડ તથા નિર્ધારિત વ્યાજ સાથે વળતર આપવાનો આદેશ કર્યો.
Auranga Times દ્વારા સ્થળ મુલાકાત દરમિયાન જોવા મળ્યું કે: 20માંથી માત્ર એક પ્લોટ પર જ બાંધકામ શરૂ થયેલું જોવા મળ્યું.
બાકીના મોટાભાગના પ્લોટ હજુ પણ ખાલી હાલતમાં છે. સુપ્રીમ કોર્ટના ચુકાદા બાદ આ પ્લોટોના ભાવિ ઉપયોગ અંગે હવે GIDCની આગળની કાર્યવાહી મહત્વપૂર્ણ રહેશે.
સુપ્રીમ કોર્ટના ચુકાદા બાદ કોંગ્રેસના રાષ્ટ્રીય પ્રવક્તા શક્તિસિંહ ગોહિલે સમગ્ર મામલે GIDC સામે ગંભીર આક્ષેપો કર્યા છે. તેમણે ED, CBI અને ઈન્કમ ટેક્સ દ્વારા તપાસ, ન્યાયિક કમિશન તથા જવાબદાર અધિકારીઓ સામે કાર્યવાહી કરવાની માંગણી કરી છે. બીજી તરફ સરકાર તરફથી આ માંગણીઓ અંગે સત્તાવાર પ્રતિભાવની રાહ જોવાઈ રહી છે.
1980 – સરીગામ ઇન્ડસ્ટ્રીયલ એસ્ટેટ માટે જમીન કબજે.
2014 – જમીન સીલિંગ કેસમાં મહત્વનો વળાંક.
2016 – જમીનની ખરીદી અને વળતરનો દાવો.
2022 – 20 ઔદ્યોગિક પ્લોટની ફાળવણી.
2024 – ગુજરાત હાઈકોર્ટ દ્વારા ફાળવણી રદ.
24 જુલાઈ 2026 – સુપ્રીમ કોર્ટનો અંતિમ ચુકાદો.
ઓગસ્ટ 2026 – કોંગ્રેસ દ્વારા તપાસની માંગ.
