નદીકાંઠાના વિસ્તારોમાંથી સ્થળાંતર, રેસ્ક્યુ, ફૂડ પેકેટ અને સર્વે કામગીરીમાં નોંધપાત્ર યોગદાન બદલ પ્રશસ્તિપત્ર એનાયત
વલસાડ | 15 ઓગસ્ટ 2026
વલસાડ જિલ્લામાં 80મા સ્વતંત્રતા દિવસની જિલ્લા કક્ષાની ઉજવણી પ્રસંગે પૂર જેવી વિકટ પરિસ્થિતિ દરમિયાન ઉત્કૃષ્ટ કામગીરી કરનાર ચાર તલાટી કમ મંત્રીઓનું સન્માન કરવામાં આવ્યું હતું.
કલ્પેશ પટેલ, કૃણાલ પંડ્યા, ચિરાગ પટેલ અને કિરાતસિંહ પરમારને પૂર દરમિયાન ફરજ પ્રત્યેની નિષ્ઠા અને ઉત્તમ સેવા બદલ પ્રશસ્તિ સન્માનપત્ર એનાયત કરવામાં આવ્યા હતા.
ગ્રામ્ય વિસ્તારોમાં રેસ્ક્યુ અને સ્થળાંતરમાં મહત્વની ભૂમિકા
પૂરની આપત્તિ દરમિયાન તલાટી કમ મંત્રીઓએ ગ્રામ્ય સ્તરે નદીકાંઠાના વિસ્તારોમાં રહેતા લોકોને સમયસર સલામત આશ્રયસ્થાનો પર સ્થળાંતર કરવામાં મહત્વપૂર્ણ ભૂમિકા ભજવી હતી.
આ ઉપરાંત સ્થાનિક તરવૈયાઓની મદદથી રેસ્ક્યુ કામગીરી હાથ ધરવા, અસરગ્રસ્ત લોકો માટે તાત્કાલિક ફૂડ પેકેટની વ્યવસ્થા કરવા તથા તાલુકા અને જિલ્લા કક્ષાએ સતત રિપોર્ટિંગ કરવામાં પણ તેમણે યોગદાન આપ્યું હતું. આ કામગીરીથી જાનહાનિ અને માલમત્તાના નુકસાનને અટકાવવામાં મદદ મળી હોવાનું પ્રેસનોટમાં જણાવાયું છે.
પૂરગ્રસ્ત પરિવારોના સર્વેમાં પણ કામગીરી
પૂર બાદ અસરગ્રસ્ત પરિવારોને ઘરવખરી સહાય મળી શકે તે માટે ઝડપી સર્વે કામગીરી પણ કરવામાં આવી હતી. પ્રેસનોટ મુજબ આ કામગીરી કાર્યક્ષમ રીતે પૂર્ણ કરવામાં આવી હતી.
મહાનુભાવોના હસ્તે પ્રશસ્તિપત્ર
આ ઉત્કૃષ્ટ કામગીરીને બિરદાવવા માટે આદિજાતિ મંત્રી નરેશ પટેલ, જિલ્લા પંચાયત પ્રમુખ હેતલ પટેલ, કલેક્ટર, જિલ્લા વિકાસ અધિકારી (DDO) તથા ધારાસભ્યના હસ્તે ચારેય કર્મચારીઓને પ્રશસ્તિ સન્માનપત્ર અર્પણ કરવામાં આવ્યા હતા.
ઉલ્લેખનીય છે કે પ્રેસનોટ મુજબ તલાટી કમ મંત્રી અંભેટી કૃણાલ પંડ્યા અને ચિરાગ પટેલને વર્ષ 2022 દરમિયાન પણ ડિઝાસ્ટર મેનેજમેન્ટ ક્ષેત્રે શ્રેષ્ઠ કામગીરી બદલ પ્રમાણપત્ર આપી સન્માનિત કરવામાં આવ્યા હતા.
જિલ્લા વહીવટી તંત્ર અને ઉપસ્થિત મહાનુભાવોએ સન્માનિત કર્મચારીઓની સેવા ભાવના તથા ફરજ પ્રત્યેની નિષ્ઠાને બિરદાવી હતી અને ભવિષ્યમાં પણ આવી જ જવાબદારીપૂર્વક કામગીરી કરવા માટે પ્રેરણા આપી હતી.
