આજના ભાગદોડવાળા જીવનમાં આપણે ઘણીવાર ઉત્સાહમાં આવીને અથવા બીજાની દેખાદેખીમાં કોઈ નવું કામ, બિઝનેસ કે કરિયર શરૂ કરી દઈએ છીએ. પરંતુ, મહાન અર્થશાસ્ત્રી અને રણનીતિકાર આચાર્ય ચાણક્ય કહે છે કે, કોઈ પણ કાર્યમાં સો ટકા સફળતા મેળવવી હોય તો કામ શરૂ કરતાં પહેલાં માણસે પોતાને 3 સવાલો પૂછવા જોઈએ. જો આ સવાલોના સાચા જવાબો તમારી પાસે હોય, તો તમને સફળ થતા કોઈ રોકી શકશે નહીં.
હું આ કામ કેમ કરી રહ્યો છું?
કોઈપણ કાર્ય પાછળનો હેતુ સ્પષ્ટ હોવો જોઈએ. શું તમે આ કામ માત્ર પૈસા કમાવવા કરો છો, શોખ માટે કરો છો કે કોઈ સમસ્યાના ઉકેલ માટે? જો તમારો હેતુ સ્પષ્ટ હશે, તો રસ્તામાં આવતી મુશ્કેલીઓ વખતે તમે હિંમત નહીં હારો.
આનું પરિણામ શું આવશે?
ચાણક્ય અનુસાર, બુદ્ધિશાળી માણસ એ છે જે કામ શરૂ કરતા પહેલા તેના સારા અને નરસા બંને પરિણામોનો વિચાર કરી લે છે. જો આ કામ નિષ્ફળ જશે તો મારી પાસે Plan B શું છે? આ વિચાર અગાઉથી કરવો જરૂરી છે.
શું હું આમાં સફળ થઈશ?
આ સવાલ તમારી ક્ષમતા અને આત્મવિશ્વાસ સાથે જોડાયેલો છે. શું તમારી પાસે એ કામ કરવા માટે જરૂરી સ્કિલ, સમય અને સંસાધનો છે? જો નથી, તો પહેલાં તે મેળવો અને પછી જ મેદાનમાં ઉતરો.
જ્યારે આ ત્રણેય સવાલોના સંતોષકારક જવાબો તમારા મનમાંથી મળે, ત્યારે જ તે કામમાં આગળ વધો. અધૂરી તૈયારી સાથે શરૂ કરેલું કામ હંમેશા નુકસાન પહોંચાડે છે.
