વલસાડ તાલુકામાં માત્ર ચાર કલાકમાં 7 ઇંચ વરસાદ; રેડ એલર્ટ વચ્ચે NDRF તૈનાત, નીચાણવાળા વિસ્તારોમાં પાણી ભરાયા
વલસાડ જિલ્લામાં સતત વરસી રહેલા અતિ ભારે વરસાદે જનજીવનને ભારે અસર પહોંચાડી છે. ભારતીય હવામાન વિભાગ દ્વારા આગામી 6 જુલાઈ સુધી રેડ એલર્ટ જાહેર કરવામાં આવતા જિલ્લા વહીવટીતંત્ર સંપૂર્ણ સતર્ક બન્યું છે. ભારે વરસાદની સ્થિતિને ધ્યાનમાં રાખી જિલ્લા કલેક્ટરના આદેશથી વલસાડ, ધરમપુર અને કપરાડા તાલુકાની તમામ શાળા અને કોલેજોમાં રજા જાહેર કરવામાં આવી છે.
જિલ્લામાં શુક્રવારે સવારે 6 થી સાંજે 6 વાગ્યા સુધીના 12 કલાકમાં વલસાડ તાલુકામાં સૌથી વધુ 8 ઇંચ વરસાદ નોંધાયો હતો. જ્યારે સવારે 6 થી 10 વાગ્યા વચ્ચેના માત્ર ચાર કલાકમાં જ વલસાડ તાલુકામાં 7 ઇંચ વરસાદ વરસતા અનેક નીચાણવાળા વિસ્તારો પાણીમાં ગરકાવ થઈ ગયા હતા. તંત્ર દ્વારા પાણીના ઝડપી નિકાલ માટે કામગીરી હાથ ધરવામાં આવી છે.
જિલ્લા ડિઝાસ્ટર મેનેજમેન્ટ કંટ્રોલ રૂમ દ્વારા સમગ્ર પરિસ્થિતિ પર સતત નજર રાખવામાં આવી રહી છે. NDRFની ટીમે વિવિધ સંવેદનશીલ વિસ્તારોની મુલાકાત લઈ સ્થિતિનું નિરીક્ષણ કર્યું હતું અને જરૂરિયાત મુજબ બચાવ કામગીરી માટે તૈયાર રાખવામાં આવી છે.
ભારે વરસાદને કારણે નદી-નાળા અને કોઝવે પર પાણી ફરી વળતાં જિલ્લાના કુલ 41 જિલ્લા પંચાયત માર્ગો વાહન વ્યવહાર માટે બંધ કરવામાં આવ્યા છે. જેમાં વલસાડ તાલુકાના 22, પારડીના 18 અને ઉમરગામનો 1 માર્ગ સામેલ છે. ઉપરાંત ઓવરટોપિંગના કારણે ત્રણ સ્ટેટ હાઈવે પણ બંધ કરવામાં આવ્યા છે. તમામ જોખમી સ્થળોએ બેરિકેડિંગ અને પોલીસ બંદોબસ્ત ગોઠવી લોકોને ડાયવર્ઝન માર્ગોનો ઉપયોગ કરવાની અપીલ કરવામાં આવી છે.
આ દરમિયાન ધરમપુર તાલુકાના ધામણી ગામના ચારીપાડા ફળિયામાં ભારે વરસાદને કારણે એક મકાન ધરાશાયી થતા ધાકલભાઈ ધવળુભાઈ કેસરે કાટમાળ નીચે દબાઈ જતાં તેમનું દુઃખદ મોત થયું હતું. બીજી તરફ ઉમરગામ તાલુકાના પળગામમાં ઘાસ ચરવા ગયેલી એક ભેંસનું વીજ કરંટ લાગવાથી મોત નીપજ્યું હતું. ઘટનાની જાણ થતાં દક્ષિણ ગુજરાત વીજ કંપનીએ તાત્કાલિક વીજ પુરવઠો બંધ કરી જરૂરી કાર્યવાહી હાથ ધરી હતી.
જિલ્લા વહીવટીતંત્રે આગામી 24 કલાક દરમિયાન પણ ભારે વરસાદની આગાહી વચ્ચે નદી, કોઝવે અને પાણી ભરાયેલા રસ્તાઓ નજીક ન જવા તેમજ જરૂરી હોય ત્યારે જ ઘર બહાર નીકળવા લોકોને અપીલ કરી છે.
વલસાડ જિલ્લામાં તાલુકાવાર વરસેલા વરસાદની વિગતો જોઈએ તો શુક્રવારના સવારના 6 થી સાંજના 6 વાગ્યા સુધીમાં નોંધાયેલ વરસાદની વિગતો નીચે મુજબ છે.
